De Ujöp Freinademetz unse na bela compëda de documënc scric de so pügn, pordiches y lëtres: les passa 90 pordiches che al á tigní a San Martin tratan süa cörta esperiënza da caplan (1876-1878), nes trasmët l’imaja de n prou dala preparaziun teologica fina y acorta; les prësc 70 lëtres scrites dala Cina a süa jënt da Oies nes dá zoruch la storia de na porsona scëmpla y straordinara, rica de coraje y de fidënza te Dî. Danter fedelté ales fontanes y finziun teatrala ti junse do ales pedies dl miscionar da Oies, ti ciarán cun i edli d’al dedaincö ai aspec umans, storics y religiusc che les testemonianzes scrites nes á lascé.
Le Sant
Ujöp Freinademetz é nasciü a Oies ai 15 de aurí 1852, sciöch’ cuarto di 13 mituns de Giovanmattia Freinademetz y Anamaria Sotvalgiarei. La familia â la meseria, mo tignî dassënn söi valurs religiusc: l’oraziun te ciasa, le jí a mëssa y la solidarieté ti confrunc di atri ê les fondamëntes dla vita da vigni de.
Ujöp se fej saurí te scora y al ti vëgn aconsié da studié inant, a Porsenú. Te seminar madorëscel la vocaziun da deventé miscionar, y al stüdia da prou por podëi jí tles misciuns. Tl mëis de merz dl 1879 pól finalmënter pié ia por la Cina, olache al restará miscionar por 29 agn alalungia.
Les dificoltés che al incunta laia n’é nia püces. La misciun é grana, le laur é tröp, y le popul cineje pê püch orentí da tó sö la religiun portada dai europeics. Ince deache la politica imperialistica di europeichs se moscedâ cotan ite tla cuestiun, y le sënn di cineji cuntra i foresti crësc de gre n gre.
Al mëss tigní fora porsighitaziuns y dolurs de vigni sort, mo al se lascia ince orëi bun da chi che al é bun da arvijiné. Ujöp vá a chirí i cineji da convertí, un a un, al ne perd mai la speranza, al prëia demeztrú y al s’un tol sura de chël popul che Dî ti á afidé.
Na rapresentaziun teatrala-musicala daldöt originala, portada dant por ladin, lingaz dla uma, te n ambiënt sugestif y original, che ne podô nia ester n ater che Oies, post de nasciüda de Ujöp Freinademetz.
Le toch teatral é basé sön n'archirida dër avisa ti documënc storics y biografics y nes porta dlungia a chësta porsona tan plëna de coraje, de suzes y desdites, de umanité y amur.
Rejia
Les scenes teatrales y la naraziun, intreciades te cianties y toc musicai che se dëura al movimënt, desfira la storia de Ujöp sön paladina: da Oies ala Cina, sön so iade che l'á porté a deventé Sant. So testamënt spiritual, le pinsier zentral dl toch, suravir le tëmp y é plü atual co mai.
Le coraje da se daurí al foresto
Ujöp da Oies á tröp da nes insigné. Nasciü te na picia vila stromenada danter les munts, sëntel bel da pice le dejider de se daurí al monn y da conësce porsones, cultures y posć nüs. Al lascia so daciasa, süa jënt y süa tera, por jí tl foresto plü dalunc y plü misterius. Zënza tëma. Al se delibrëia de sü preiudizi, al lascia tosc sön na pert so sentimënt de superiorité.
Scebëgn che al sides fi de so tëmp, caraterisé da na religiosité scioda y stara, é Ujöp bun da mët en discusciun sü orizonc de fede y sües convinziuns personales. Rové tla Cina por porté la religiun, capësc Ujöp che al podará dé inant la verité dl Vangele, ma sce al se fajará ince ël cineje danter i cineji. Y madër sce al ti fajará sintí a chë jënt che al ti ó bun.
